政壇：乳鴿區諾軒台北狂打卡
傳聞海怡西商場嘅大業主台灣太電集團有意將商場改為特賣場，居民恐怕引來大批內地客。各黨派見到呢舊肥豬肉梗係唔會放過啦。泛民率先搞遊行成功博出位，新當選區議員嘅新民黨Judy陳家珮輸咗第一仗，拿拿聲出招直飛台灣同大業主會面，算係打成平手。估唔到白鴿黨仲唔死心，尋日竟然急派「乳鴿」、隔籬利東區議員區諾軒去埋台灣見業主，佢仲不停喺社交網站打卡。
區諾軒喺台北太電集團總部狂打卡。（互聯網圖片）
俗語有話「執輸行頭，慘過敗家」，區諾軒尋日全程未停過喺facebook更新狀況，又不時上載自己身在太電總部嘅相片，連同佢會面嘅太電副董事長鄭超群及總裁李超群卡片都擺埋上網。
話時話，Judy本來話尋日會再同業主會面，唔知呢兩位港男港女，會唔會喺台北撞到正呢？
