三堆一爐又遇阻 垃圾官僚自取辱

嗱，俗稱「三堆一爐」嘅擴建三個堆填區及興建焚化爐方案，咪就係港府經典撞板之作囉。立法會工務小組尋日繼續討論其中「一堆一爐」，即係擴建將軍澳堆填區及興建石鼓洲焚化爐嘅撥款申請，結果又係碰到一鼻子灰。議事堂上炮聲隆隆，有人批評當局減廢不力，有人批評方案破壞生態，有人質疑堆填區爆滿嘅可信性，有人更提出大量修訂玩拉布添。咁都未算激吖，一批將軍澳居民拉隊踩場，喺公眾席上喧嘩，最後同保安員爆發衝突，簡直七國咁亂。會議被迫暫停，留待下回分解，不過下回一樣唔樂觀嘅咋。

撥款申請又撞板，當局點解畫呢？環境局局長黃錦星話喎，香港已經冇其他選擇，三堆一爐籌備咗十年，唔可以再拖，又重申現時已經有措施改善地區衞生，長遠希望香港做到「生活垃圾零堆填」咁話。一句講晒，即係講廢話。

老實講，邊個唔知三堆一爐唔可以再拖吖，問題係主事官員咁無能，點樣推動呢？各位垃圾官僚，你哋不妨捫心自問，今次已經係三堆一爐第N次闖關，點解阻力重重？點解問題多多？點解搞到民怨四起火頭處處？咪因為你哋冇吸取教訓，努力做好自己份工囉。好簡單，堆填區到底幾時爆滿，係推銷三堆一爐嘅基本資料，但係當局連呢樣嘢都未搞清楚，導致反口覆舌，一時話一三年，一時話一四年，尋日喺會議上畀人問到口啞啞，咁叫市民點信你哋吖。

仲有吖，舊年擴建三個堆填區計劃向立法會闖關，屯門、打鼓嶺、將軍澳三區一齊上，點知由於將軍澳地區反彈太大，當局臨時腳軟，主動撤回該區方案，搞到另外兩區群情洶湧，臨門一刻轉軚反對，最後三大皆空，功敗垂成。港府撞完一次大板，居然不知反省，明明話三區綑綁，缺一不可，家陣又嚟玩分拆，簡直令人莫名其妙。港府朝令夕改，進退失據，咁樣推銷三堆一爐，唔失敗至奇喇。

所以話啫，太一叮有時好佩服港產官僚，屢戰屢敗已經夠羞家嘅喇，仲要錯完再錯，撞板之後再撞板，睇怕全世界搵唔到第二個咯。其實，港府如果真係想三堆一爐早日成事，辦法唔係冇嘅，就係先將班垃圾官僚送去堆填區喇，叮！