城中鏡：讚金秀賢皮膚靚 何倍倩：毛孔都無
恒生新抱何倍倩早前迷上韓劇《來自星星的你》，對劇中嘅男主角「都教授」金秀賢大為欣賞，估唔到金秀賢來港出席某護膚品牌發布會時，佢竟然有幸被抽中同對方合照，成為朋友間嘅熱話。
何倍倩（左）有幸被抽中同偶像金秀賢（中）合照。
照片早前啱啱送到何倍倩手上，佢心情仍然興奮，忍唔住放上網同朋友分享，佢話：「第一次見佢真人感覺好唔同，估唔到佢咁高，而且皮膚咁好，可能我做美容生意，係職業病，所以成日望人啲皮膚，佢係我見過最靚皮膚嘅男人，連毛孔都無。」佢又話好多朋友都羨慕佢可以同金秀賢合照，每當佢讚金秀賢皮膚好嘅時候，喺旁邊嘅老公都忍唔住話佢傻傻哋。
