移民日本東京多年嘅歌星Agnes陳美齡將回歸香江，咪誤會，唔係重返舞台開騷，而係執教鞭。當年風靡萬千少男少女嘅Agnes，唔止唱得，而且仲係史丹福大學教育系博士，早已喺日本做教授，近日佢就獲浸會大學邀請來港做訪問教授，唔知到時會否掀起一番追星熱潮呢？

陳宇齡（右）話好期待家姐陳美齡回港教書，左為其太太陳文綺慧。

陳美齡到九月開學後就正式喺浸大執教鞭。

孫秉樞再度當選東華三院歷屆主席會主席。

攻讀心理學碩士嘅梁定宇笑言，暫未決定將來係咪做心理醫生。

「靈芝大王」Abraham陳宇齡嘅家姐就係Agnes，太太陳文綺慧則係東華三院前主席，兩人日前一齊出席東華三院歷屆主席會周年會員大會晚宴。Abraham透露，家姐Agnes本月會回歸香港，會先留一日分享教育心得，到九月開學後就正式喺浸大執教鞭。問佢會唔會擔櫈仔聽家姐教書，佢謙稱未夠班，笑言鍾意遊山玩水多啲，早前佢就相約一班中學同學遊大阪，品嘗一間有三百六十年歷史嘅人氣壽司店。

孫秉樞攻中下價鐘錶市場

同樣好學不倦嘅東華三院前主席梁定宇，喺中文大學攻讀心理學碩士眨眼已一年，但佢話暫時未決定係咪會投身做心理醫生喎。

講番東華三院歷屆主席會，已選出新一屆執行會董，「鐘錶大王」孫秉樞再度冧莊，當選歷屆主席會主席。再次効力東華三院，佢話唔怕冇晒私人時間，笑言自己角色只係從旁協助，唔會干預董事局決定。孫秉樞透露，將會投放更多時間發展鐘錶生意，主攻中下價鐘錶市場。

第一手消息請下載on.cc東網iPhone/iPad/Android/Windows Phone Apps