政壇：搞搞政：小型拉布玩殘黃錦星

喺會議上，議員范國威聯同「大舊」陳偉業好似想搞小型「拉布」行動，提出共十三項動議同五項臨時動議，內容主要要求政府先處理某啲環保政策後，先至擴建堆填區；而當表決係咪處理呢啲動議前，范國威又向政府提出約十條提問，所以搞到環境局局長「星星」黃錦星暈陀陀，將「三堆一爐」講成「一堆三爐」添，十足打邊爐咁烚吓烚吓咁，認真蝦碌。

至於西貢區議員「哪吒」方國珊一朝早喺會議開始前，就聯同約十名將軍澳居民喺立法會外上演街頭劇，戴住有星星扮演納粹黨領袖希特拉嘅面具，話政府堅持擴建堆填區，等於納粹黨逼居民吸毒氣喎！而四大環團亦有約十名成員到場，話政府喺擴建堆填區前，應先做好減廢措施。

但當哪吒同班居民入到會議廳公眾席旁聽時，就不時高呼口號請願，最後仲被保安員要求離開。不過，喺保安員請佢哋離場期間，雙方發生衝突，有居民聲稱被保安員插眼，保安員就指居民擾亂秩序，最後搞到報警收場。委員會最後因居民同保安員之間嘅衝突而休會，到下禮拜二先至繼續審議有關方案，預料方案屆時會完成表決。