政壇：小學雞阿王唔認飲奶茶
立法會喺上禮拜三告流會收場，負責帶頭拉布嘅「長毛」梁國雄開腔怪責議員「阿王」王國興留喺前廳歎奶茶，先至搞到流會，事隔一個禮拜，阿王終於反擊呢一個指摘。
王國興
尋日立會繼續進行拉布戰，正當長毛拉到忘我境界時，阿王就突然起身回應「飲奶茶事件」，批評長毛「生安白造」。阿王仲自爆一直對奶類產品敏感，一飲奶就會肚痛去廁所，所以從政多年嚟未試過喺立會掂過任何含奶嘅飲品，以免重要關頭要去廁所喎，更何況係奶茶？所以流會唔關佢事。
連立會主席都覺得呢件事太「小學雞」，即刻要求阿王終止發言。聽到阿王咁講，長毛都冇晒辦法，惟有話阿王冇飲奶茶，可能當時只係飲緊檸茶。
其實阿王飲乜嘢唔係重點，重點係佢因為飲嘢而太遲返回會議廳，成為流會幫兇。
