政壇：李洪波送包硬銷政績

依家不論建制派或泛民主派嘅區議員，都大搞蛇齋餅糉冧街坊，但答啱問題就獲送漢堡包就較為罕見。我哋最近喺網上見到，白鴿黨荃灣區議員李洪波喺區內派發傳單，指明當區居民答啱晒單張印載嘅問題，交番去佢嘅辦事處，就可得到食物券換取漢堡包一個。

李洪波最近嘅傳單印有問題，指明居民答啱晒就獲送漢堡包。（互聯網圖片）

李洪波份單張共有六條問題，其中四條係「四揀一」選擇題，問題通通同佢有關。舉例指，首條問題係李洪波早前要求遷拆區內公園嘅電訊發射器原因；第五條問題就涉及李洪波辭去教師工作做全職議員嘅原因。李洪波要居民答啱晒問題先有漢堡包食，變相要居民牢記佢過去做過啲乜，硬銷自己嘅味道甚濃。