政壇：AV仁亂擰咪兜搞冧檔
立法會會議廳外長期都擺放咗個「咪兜」喺度，方便議員同官員行埋去接受訪問，但對於好似「AV仁」何俊仁身材咁矮小嘅議員嚟講，好多時都要校低個「咪兜」就佢。咁啱尋日AV仁接受訪問時，個「咪兜」遮咗佢半塊臉，佢於是自行校低個「咪兜」，點知左擰右擰都搞唔掂，惟有等立會職員嚟幫手。AV仁為免一碌木咁企喺度咁尷尬，就自行返入前廳等候。
AV仁左擰右擰都校唔低個「咪兜」，之後仲搞到跌落嚟壓親人添！
不過，過咗幾分鐘都未見有立會職員出嚟幫手，一位攝影師就出手，點知呢個時候成個「咪兜」跌咗落嚟，仲壓親攝影師個頭添，真係唔好彩嘞，都唔知係咪之前AV仁擰過個「咪兜」累事。如果AV仁下次行埋「咪兜」時又係唔夠高嘅話，睇嚟都係自己擔張櫈仔方便啲，或者秘書處提供張櫈仔畀佢，咁樣唔使勞師動眾嘛！
