政壇：梁栢賢抄《星星》大放笑彈
醫院管理局尋日起一連兩日舉行一年一度嘅研討大會，行政總裁梁栢賢年年喺大會致開幕辭都搞新意思，包冇悶場，尋日佢食正爆紅韓劇《來自星星的你》熱潮，喺用Powerpoint講解醫療服務時自稱係「來自HA的我」，連劇集名嘅字體都抄到十足，認真搞鬼，難怪睇過該劇嘅在場人士都忍唔住笑咗出嚟。
梁栢賢嘅自我介紹Powerpoint抄足《星星》字體。
又扮未來戰士
梁栢賢仲大讚醫管局醫療儀器日新月異，比喻話好似以前用緊水壺咁大嘅大哥大電話，依家就用智能手機上網，而最新嘅就係Google Glass ，講到呢度，螢幕上竟然顯示佢個樣key咗落去Google Glass度，簡直係未來戰士咁款，又引嚟一陣笑聲。
講番醫管局未來發展，佢話人口不斷老化，醫療開支勢必增加，估算2041/42年度醫管局財政開支達到一千六百九十億元，係依家嘅三點八倍，需要請多六千二百個醫生，同增加一萬八千張病床先應付得到。
首次以醫管局主席身份出席會議的梁智仁都話局方面對好多挑戰，包括病人睇病輪候時間長等，局方要努力應付至得。
