港鐵港府亂鬥亂 有責不問添民怨

立法會鐵路事宜小組委員會淪為「道歉大會」，先由運輸及房屋局局長張炳良打頭陣，再由港鐵高層接力，人人爭住道歉認衰。即係咁，錯就要認，打就企定，呢單醜聞佢哋都有責任，道歉認衰係最基本嘅指定動作，但一講到問責咯喎，個個唔係顧左右而言他，就係裝聾扮啞，只有已宣布提早退休嘅工程總監周大滄表示獨自承擔責任，成為替罪羔羊。其實，高鐵工程嚴重延誤，而且隱瞞不報，周大滄固然有責任，而其他港鐵高層及港府官員同樣難辭其咎，點可能由一個人承擔晒o架。

正所謂，冤有頭，債有主，高鐵醜聞愈揭愈多，立法會議員炮聲隆隆，一致認為第一個要問責嘅非行政總裁韋達誠莫屬。立法會鐵路事宜小組主席田北辰係咁講嘅，韋達誠無監管好高鐵工程進度，仲致電張炳良要求唔好公布未能如期通車，搞到局長周身蟻，實在罪無可恕；泛民議員范國威就認為，就算周大滄主動承認責任，佢嘅上級亦應被問責，韋達誠絕對要負最大責任；而工聯會嘅鄧家彪更加索性叫韋達誠辭職添。

呢啲咪就係民意囉。有權利就有責任，韋達誠享有過千萬年薪，根本冇做好自己份工，除咗高鐵工程一鑊泡，港鐵服務水平更加係每況愈下，佢唔負責邊個負責呢？最匪夷所思嘅係，高鐵工程嚴重延誤，無法如期通車，而且隨時大幅超支，港鐵唔止冇受到懲罰，仲可以按合約向政府收取數十億元項目管理費，變成港鐵犯錯，市民受罰，你話仲有冇荒謬啲吖？

當然喇，高鐵工程之所以搞成咁，港府同樣罪無可恕。作為港鐵最大股東，而且高鐵又係本港最重要基建，港府竟然闊佬懶理，冇監冇管，出事後淨係識得驚訝同失望，簡直豈有此理。張炳良身為問責局長，唔止冇履行監管職責，仲配合港鐵一齊講大話，欺騙公眾，市民又點止驚訝同失望咁簡單吖！

事實證明，港府長期放任自流，港鐵已經成為一隻不受控制嘅龐然怪獸，再唔徹底改革，加強監管，遲早爆大鑊嘅咋。嗱，今次高鐵延誤醜聞到底點收科，港府係咪做到有責必問，全港市民都睇到實o架，唔好以為可以蒙混過關吖，叮！