城中鏡：鄧達智牛一盼做垃圾佬
著名時裝設計師鄧達智（William）患咗腸癌二期，近日佢康復進度良好，日前牛一之喜，啲好友爭住同佢食飯沖喜。講到生日願望，William語出驚人話好想做「垃圾佬」，事關佢屋企元朗圍村近年多咗好多垃圾，所以佢希望一有時間就推架車仔出去執垃圾，執得幾多得幾多喎！
大病初愈嘅鄧達智（右）獲陳曼芝送上祝福。
William話，佢無意針對內地人，不過隨着愈嚟愈多新移民搬入元朗，圍村的確污糟咗，佢屋企門口周不時變臨時垃圾站，激到佢紮紮跳，所以今年生日願望係做「垃圾佬」。佢嘅生日派對有好多人，「小鳳姐」徐小鳳、珠寶設計師陳曼芝及時裝設計師文麗賢都有到場。抗癌中嘅William胃口唔錯，但就戒食紅肉及雞肉，飯前必吃五條秋葵。William話，唔會放棄工作，五月照飛瀋陽、湖南開時裝騷。
