城中鏡：仁濟主席食牛蒡養生
仁濟醫院董事局多名成員尋日齊齊亮相，出席喺荃灣舉行嘅嘉年華會，主席蘇陳偉香（Susan）話，希望藉尋日嘅活動宣揚正能量，其他嘉賓仲有新界社團聯會理事長陳勇、荃灣區議會副主席鍾偉平及理工大學前校長潘宗光等人。
蘇陳偉香（右起）、黃美斯及鄭李華熙齊齊食牛蒡、篤魚蛋。
陳李詠詩（右）好奇試戴吳國榮新買嘅google glass。
篤信佛教嘅潘宗光（左）喺活動中雙手合十。右一及二為鍾偉平及陳勇。
不過，仁濟董事局成員聚埋一齊，竟然係分享新發現，事關吳國榮總理新買嘅google glass。呢副價值一千五百美元嘅眼鏡，可以透過語音指示錄影或拍照，仲可即時上載至社交網絡，目前喺香港仲未有得賣，難怪吸引仁濟副主席林煒珊、總理陳李詠詩等人爭住試戴。不過呢個流動通訊及攝影新寵被指高度侵犯私隱，吳國榮就話唔驚畀人話偷拍，事關佢影相前一定會問過人哋先，仲會將指示讀出聲，務求大家知道佢做緊乜嘢。
當早餐改善血糖
呢個嘉年華好熱鬧，素食區最有人氣，Susan同總理鄭李華熙（Winnie）及黃美斯都喺區內食得好開心，睇真啲，佢哋食緊香煎牛蒡等。Susan話自己有食牛蒡嘅習慣，仲分享健康秘方，佢話，有次佢食完糖水驗血糖，見到個指數差啲超標，後來朋友介紹將牛蒡混合菊花及杞子攪碎沖麥皮當早餐，食咗一個月後再去飲糖水驗血糖，發現情況有改善，所以依家就一星期食一次當養生。
Winnie就話，佢自細已跟隨家人信佛，不過食唔食素就好隨心，佢間中會不定期食齋，同埋帶媽媽一齊去佛教聖地浙江普陀山朝聖，盡孝兼禮佛，一舉兩得。
