政壇：搞搞政：郭偉強做無良僱主？

勞工處一個搵工網站顯示，郭偉強議員辦事處要請議員助理，資歷要求係專上教育或學位課程，識講良好粵語、普通話同英語，識讀寫中文同英文，修讀大學社工系、公共政策或其他科學系添。要求咁高，薪酬卻只得四千元一個月。

睇真啲，原來呢份係兼職工作，雖然要求高，呢位助理每周只須工作三日，每日工作四小時，即係平均時薪八十三元，以時薪嚟睇，份人工都唔係咁過分。郭偉強解釋，除咗歡迎有學歷同經驗嘅朋友應徵份工之外，亦歡迎學生嚟試吓，因為青年人可以藉此接觸社會。咁依家請到人未呢？佢就話收到十幾份申請表，估計會於下星期陸續安排面試！

除咗郭偉強外，喺上屆區議會贏咗立法會議員李卓人嘅「工聯小花」元朗區議員劉桂容，以及同屬工聯會嘅黃大仙區議員譚美普都請緊議員助理，月薪介乎八千五百元至一萬多元，似乎政府加咗津貼之後，真係對區議員資源分配帶嚟唔少幫助喎。