老字號粥麵店第二代傳人黃天鍾意鑽研文化，不但棄用智能手機，仲至今保留以書法寫信及字條，佢啱啱完成一本關於釣魚島著作，厚厚一疊二十五萬字草稿都係用手寫。黃天笑稱，好多朋友收到佢嘅字條或信件都唔捨得丟棄添！

伍翠瑤（左）十分欣賞黃天嘅才氣。

金銀業貿易場理事長張德熙太太兼博愛醫院前主席伍翠瑤（Jennifer）好欣賞黃天嘅才氣，多年前相識之後就當佢係寶，經常介紹佢畀朋友認識。Jennifer一向致力推廣中國文化，亦係中國國情研習促進會創會會長，佢盛讚黃天唔似生意人，因為佢接手家族生意之前從事文化工作，國學及歷史知識好淵博，仲係釣魚島問題嘅權威添！

黃天笑笑口話，十幾年前別無選擇接手粥麵店，只好一邊做生意，一邊研究文化，依家每日三、四點前佢係生意人，然後就返屋企寫書，做番文化人，幾乎零應酬。由於佢作息簡單，所以唔用手機都話冇問題吖！

第一手消息請下載on.cc東網iPhone/iPad/Android/Windows Phone Apps