政壇：潘兆平望做廿年前議員
勞聯主席潘兆平接下前勞工界立法會議員李鳳英火棒，只係做咗立法會議員兩年，竟然搞到五勞七傷，佢呻開會多、坐得耐，已經出現靜脈曲張，仲成為高血壓、高血糖及高尿酸「三高」人士，總之身體付出好大代價，認真誇張。
潘兆平（左）做議員兩年，自爆已成三高人士，旁為李鳳英。
圖為潘兆平十多年前照片。
佢仲話，好希望做二十年前嘅議員，據聞當年班議員下午兩點半開會，五點鐘走得，仲有時間可以入馬場玩喎！
佢回顧初入立法會第一年，新丁凡事要跟到足、壓力又大，加上食無定時，所以就搞到血壓、血糖同尿酸都過高，褲頭仲闊咗成吋添。第二年，因為坐得多，所以出現靜脈曲張嘅徵狀。佢坦言，英文唔叻，睇立法會英文文件要比人哋用更長時間，惟有將勤補拙，趁立法會拉布期間用智能電話溫習會議嘅文件，閒時又會請教英姐。雖然佢猛話恨做二十年前嘅議員，但時光係冇得倒流o架！雖然係咁，佢都認命話無論工作幾咁繁忙，總算得到家人嘅諒解及勞聯兄弟嘅支持，所以先捱得過去。咁佢下一屆會否再參選？佢話，搞掂呢屆先算喇！
