高鐵風波愈演愈烈，尋日係佛誕，原本獲政府委任為高鐵獨立專家小組主席嘅港大岩土工程講座教授李焯芬亮相一個佛誕活動，大家好關注佢閃電請辭個件事，雖然運輸及房屋局局長張炳良事後承認喺事件上「蝦碌」，但李焯芬尋日卻明言唔鍾意「蝦唔蝦碌嘅字眼」，其實蝦碌又冇特別貶義，莫非自言係佛教徒嘅李焯芬因宗教關係，對葷菜特別敏感？

李焯芬昨日露面，坦承佢唔鍾意蝦碌呢個字眼。

李焯芬尋日解釋，以為政府有佢履歷，知道佢出任公司董事嘅情況，而涉及高鐵工程嘅公司本身有好多工程，佢冇特別跟進究竟有邊啲。而且，當初政府接觸佢時，諗住幫得人就幫，點知原來涉及利益衝突。佢解畫時，直腸直肚話好唔鍾意蝦唔蝦碌嘅字眼，但佢亦冇糾正呢個說法，究竟李焯芬係唔鍾意張炳良承認蝦碌呀？定係有乜特別意思呢？

第一手消息請下載on.cc東網iPhone/iPad/Android/Windows Phone Apps