政壇：覺光籲大眾 除貪自省
社會文化往往折射一個地區人民嘅價值觀，尋日係佛誕，香港佛教聯合會喺紅磡體育館舉行浴佛大典，會長覺光大師喺典禮上語重心長咁講浴佛之道，佢話浴佛唔係要浴個佛像，而係要浴心，勸喻大家要反省自身、清除貪心。大師揀喺一年一度嘅佛誕上作呢個勸喻，唔通有感本港社會近年貪污醜聞日增，「貪曾」前特首曾蔭權爵士同「貪湯」前廉政專員湯顯明嘅貪腐醜聞為患官場、影衰香港？
設計圖片及對白
香港佛教聯合會尋日喺紅磡香港體育館舉行咗個盛大嘅浴佛大典，由年過九旬嘅覺光大師親自主持。覺光大師喺致辭時語重心長咁同大家講，大家要反省自身，清除「貪心」、「怨憎心」同「無知無明」嘅心，如果人人都有「慈善心」、「喜捨心」、「感恩心」，社會就會和諧，人心亦會安寧o架喇。佢嘅說話明顯針對社會不和諧、人心不安寧而來。
望世人迷途知返
尋日嘅活動有好多佛門中人同居士參加，副會長黎時煖居士亦有講到佢嘅憂慮，佢話，大家趁佛誕良辰歡欣慶祝之餘，都要反思對釋尊寶訓係咪已經致力身體力行，呢個先係佛誕嘅最佳意義。佢又話，目前社會唔少人都因物欲同被不良資訊影響，以致心靈受到嚴重污染，行為失常，呢啲都令到佢哋好憂慮。而佢哋深切關注嘅係中華民族優秀嘅禮義廉恥、珍貴嘅文化教育都有日漸熄滅之勢，呢啲都成為社會前途嘅隱憂。佢期望世人可以迷途知返、守戒除惡、專心向善咁話。
兩位聯會領袖不約而同發出呼籲，一個講戒貪、一個籲戒物欲，明顯對時下唔少港人重物質、貪婪不自制嘅情狀感到憂慮。自從雙貪醜聞及高官涉受賄等事件曝光以來，港人對本地公共行政嘅信心同清廉都大打折扣，兩位佛門中人借佛誕敲響警鐘，正係要各界好好反思。
