點解香港競爭力每況愈下？點解香港畀新加坡趕上並超過？原因當然有好多，其中一個重要嘅原因就係香港教育太混帳，搞到後生仔女一個一個對前途冇信心，香港遲早玩完。

嗱，有機構訪問香港、內地、台灣同新加坡四地年輕人，結果發現新加坡年輕人自覺最有競爭力，同時喺溝通技巧、國際視野、人際關係、學歷同工作能力方面嘅信心，都比香港年輕人強；另一方面，香港年輕人對教育政策嘅接受程度遠比其他三地低，認同教育政策足夠嘅只有一成八咁大把。調查機構都話嘞，資助學士學位不足影響年輕人搵工，建議港府增加教育投入，增加年輕人自信心同競爭力咁話。

呢個調查結果一啲都唔令人驚奇。本港教育制度朝令夕改，進退失據，早已經係有口皆悲o架啦。香港教育政策出名五時花六時變，官員拍拍腦袋就話「推陳出新」啫，可憐莘莘學子慘變教育白老鼠，根本無所適從。你話嘞，年輕人點可能對教育政策滿意吖，點可能冇怨氣吖。

大家有眼睇啦，依家稍有條件嘅家庭都將仔女送去外國讀大學，固然反映佢哋對香港教育制度冇信心，實行用對腳投反對票，最要命嘅係，香港專上教育普及率非常低，有人形容爭入大學好似「千軍萬馬過獨木橋」，一啲都冇誇張o架。呢，家陣香港人口中只有一成幾擁有大學或以上學歷，唔止遠低於鄰近地區，同唔少第三世界地區都不相上下，你話係咪香港之恥吖。

更悲哀嘅係，年輕人讀唔成書固然難以同人競爭，即使勤奮向上學有所成，都未必可以向上流動。網上熱爆潮文話齋，「喺香港月入一萬真係同等死冇分別」，根據呢個標準，好多大學畢業生都「生不如死」。大家記唔記得早前八十後中大畢業生「慳妹」呀？佢畢業後一直獨力承擔一家七口重擔，多年嚟連大假都唔敢放，卒之壓力爆煲跳樓輕生。乜唔係話教育可以脫貧咩？唔係話勤勞可以致富咩？「慳妹」夠好學啦啩、夠勤勞啦啩，點解落得如此悲慘下場？

有人怪責後生仔愈嚟愈激進，冇錯，年輕人示威衝擊警方、肢體推撞嘅激烈場面的確無日無之，呢，尋日反高鐵遊行就搞到七國咁亂，卒之搞到施放胡椒噴霧收場。不過話分兩頭，如果年輕人睇到前路，邊個咁得閒走出嚟衝呀，貪玩咩？

毛伯伯形容年輕人「好像早晨八、九點鐘的太陽，希望寄託在你們身上」。眼見今日班後生仔自己都陷入絕望，呢個社會又可以寄託畀邊個呢？

第一手消息請下載on.cc東網iPhone/iPad/Android/Windows Phone Apps