城中鏡：寧高寧讚嘆美國軟實力

好似港口、道路、GDP同進出口呢啲見得到嘅發展，就係大家所認識嘅硬實力，其他方面如運動發展、學術環境、環境、民族傳統，甚至係電影市場，都構成軟實力，代表住文明、文化、價值觀同生活方式等。

寧高寧去完APEC嘅CEO峰會後，大嘆：「美國軟實力太厲害！」佢仲提到硬實力，如果無軟實力嘅支撐，就變得無咁誘人。

呢次會議討論嘅主題「堅韌恢復」（Resilient Recovery），係基於普華永道會計師行嘅調研報告而定；對國家同公司嘅債務評價，係嚟自美國標普同穆迪評級公司；而對數字嘅審計，則由美國四大會計師行負責。

此外，會議中對金融市場嘅評價分析，係出自美國幾間大嘅投資銀行同投資基金管理公司；提出建議增強復甦活力嘅就係美國幾間諮詢公司；甚至會議現場所有嘅消息發布，亦基本上由美國幾間電視台直播。

以上所有定標準、審數字、管錢、管消息發布嘅工作，都可稱為軟實力，同硬實力產生相互作用直接相連。所以，美國軟實力方面嘅強大，變相令其本身嘅硬實力得以穩固，甚至發展得更好。