商務及經濟發展局正全力推動創新及科技局嘅建議到立法會「闖關」,盛傳係創新及科技局局長大熱人選嘅理大副校長楊偉雄,尋日出席理大創新科研活動時,全程笑意盈盈四萬咁口,當問佢係咪準備加入政府做局長時,佢起初對此不作評論,自言過去四年喺理大都過得好開心,之後再三被追問時就話呢個時候唔講呢啲嘢,認真耐人尋味。

楊偉雄多次被問及是否加入官場時,都未有正面評論。

有傳楊偉雄會喺下年約滿理大副校長,究竟會續約留低定係離開備受外界關注。佢尋日未有就自己去向留下注腳,只係話一切由理大校長決定;再三被追問係咪入政府時,佢繼續保持笑容,但疑反客為主同記者講「你放過我啦」,之後就一直笑而不語無再開腔答問題。

由於有泛民議員事前張揚要就創新及科技局「開位」拉布,依家開局根本十畫都未有一撇,如果楊偉雄真係有心入官場,第一樣要學習嘅嘢,就係要畀啲耐性耐心等吓嘞!

第一手消息請下載on.cc東網iPhone/iPad/Android/Windows Phone Apps