城中鏡：羅寶文勉港青咪怕輸
港珠澳大橋快將通車，日後港珠兩地交往將更頻繁。一班珠海十大傑出青年尋日率先來港交流，傑出青年協會主席Poman羅寶文以主人家身份喺旗下一間酒店請食晏。眼見內地新星輩出，Poman好感觸，慨嘆時下香港年輕人對前景睇得太灰，經常埋怨自己生不逢時，輸在起跑線上。
羅寶文（右）同關俊華（左）寄語年輕人要敢於付出，唔好怕蝕底。
香港傑青鄭偉才（左起）、姜炳耀、梁裕龍同林景昇鼓勵年輕人勇於追夢。
珠海靚女傑青劉毅梅（右）同邱美寧（左）來港交流。
Poman當上傑青主席後會議不斷，搞到睡眠不足，但講起未來工作就眼仔睩睩醒神晒，五位珠海傑青到訪，佢更加興奮。呢班傑青臥虎藏龍，有石油公司高層，亦有開設主題酒店、食品同物流公司嘅老闆，幾位睇落好年輕，卻已獨當一面，當中一位雖然係「富二代」，仍堅持靠雙手打拚一番事業。難怪Poman聽完佢哋嘅奮鬥經歷都話好佩服，驚覺內地人素質近年突飛猛進，香港人真係要加把勁嘞！
指內地後生仔朝氣勃勃
為香港人加油，無理由得個講字，Poman坐言起行，七月將舉辦「夢想工程」論壇，鼓勵年輕人「追夢」。參加者要先為夢想構建藍圖，然後喺論壇上即場拉票，勝出者將獲得數萬元獎金，助佢哋完成夢想。佢話接觸過唔少青年人，覺得佢哋對前景嘅睇法好灰，相反內地後生仔朝氣勃勃，肯搏又敢創新，白手興家例子多的是。所以佢寄語香港年輕人唔好怕輸，勇於付出，未來仍係海闊天空。
有份主辦「十大傑青」選舉嘅國際青年商會香港總會會長關俊華，都鼓勵年輕人摒棄「未打先輸」心態。佢話香港人英文、普通話流利，出入境自由，去世界各地交流話咁易，應該放眼世界，提升國際視野，只要踏前一步，前面仲有大把世界喎！
