每年嘅巴郡周年股東大會都會吸引一眾粉絲前往朝聖，有人想一睹股神巴菲特風采，有人則想喺股神口中得到投資以至人生啟示，今年有位男股東更別出心裁，借住呢個盛會做啲私人嘢，扮去買鏈，實質買求婚戒子畀女友兼求婚，難得巴菲特玩埋一份，最後梗係大團圓結局啦！

喺巴菲特嘅配合下，男股東向女友求婚當然得米啦！（互聯網圖片）

呢位男股東希望以驚喜方式向女友求婚，於是假裝同女友去巴郡旗下珠寶商Borsheims買鏈，途中巴菲特過嚟同佢哋見面同推銷，左揀右揀，其實邊係揀鏈吖，大家扮吓嘢咋。

巴菲特喺呢個時候，就神神秘秘咁喺個西裝袋入面，攞咗個盒出嚟，打開一睇，原來係預先準備好嘅訂婚戒指，男主角亦即場下跪向女友求婚，女友當然十分驚喜同感動啦，邊咀邊答應求婚，在場嘅人都好戥佢哋開心，巴菲特仲親自斟香檳同佢哋舉杯慶祝添！

早已承諾捐出身家嘅巴菲特喺會上提到，死後會捐出所有手持嘅巴郡股份，現金就會留畀太太。

第一手消息請下載on.cc東網iPhone/iPad/Android/Windows Phone Apps