政壇：「公僕加薪表」圈內流傳
唔使問都知，打工仔最關心嘅事就係加人工，手捧鐵飯碗嘅公務員亦唔例外。近日喺公務員圈內流傳一張新一年度嘅公務員總薪級表，聲稱中低級公務員今年嘅薪酬加幅有百分之四點七九，高過通脹率，亦明顯好過去年嘅百分之二至三。個表仲幫佢哋計埋三個月嘅加薪追溯期添，好似真嘅一樣。
近日公務員圈子內流傳呢張假薪級表，聲稱中低級公務員今年將加薪近百分之五。
不過據了解，公務員薪俸及服務條件常務委員會轄下嘅薪酬趨勢調查委員會，呢兩日先啱啱收集完相關私人企業嘅薪酬加幅數據，冇可能咁快出到條數。而且類似惡搞事件早兩年亦發生過，當時有人喺公務員圈子內廣傳一啲假資料，聲稱該年嘅薪酬加幅將會高達百分之七，變相提高咗啲公務員工會嘅期望。有個別工會更「以假亂真」，向政府提出該年最少要加薪百分之七，最後結果當然係冇咁多啦。
