自從○八年開始參選立法會後，梁美芬一直打住「西九新動力」旗幟，直到前年佢至加入以工商界為主嘅經民聯。尋日梁美芬喺美孚插旗開議員辦事處，但搵勻成個辦事處，都唔見經民聯標誌，反而西九新動力個標誌就大大個，唔通佢覺得西九新動力個名好聽啲？

梁美芬喺美孚嘅新議員辦事處仍然掛住西九新動力嘅標誌。

梁美芬咁做，原來係精心計算嘅選舉策略。佢解釋話係因為部分西九新動力區議員冇加入經民聯，如果用呢個名開辦事處，咁部分西九新動力成員就唔可以運用辦事處資源嘞！

佢仲話唔用經民聯名義其實都有好處，事關辦事處人力物力全部由西九新動力搞掂，既然唔係用公帑，自然無咁多掣肘。話雖如此，但佢都係時候諗吓辦法喇，唔通到下屆選舉時，佢仍打住西九新動力嘅旗幟咩？

第一手消息請下載on.cc東網iPhone/iPad/Android/Windows Phone Apps