每逢六四、七一等政治敏感時刻，泛民主派人士往返內地都被內地有關執法部門特別「照顧」，好似白鴿黨立法會前教育界議員張文光曾提過，過往識得一位同已故支聯會主席司徒華同名同姓嘅老師，返親內地過關時都遇阻滯。不過信不信由你，咪以為呢個係泛民「專利」，原來連身為港區全國人大代表嘅新界社團聯會理事長陳勇，近年過關時都易有阻滯。

設計圖片及對白

等十分鐘始獲放行

陳勇話自從前年年底當選人大後，每三次過關就有一次被截查，不過共通點係等十分鐘左右就獲放行，事後不獲告知所為何事。當問及身為人大嘅佢點解仍被截查，佢就自爆平時循正常通道出入，自然唔會有特別待遇，估計或者同姓名有關。

即使身在香港，陳勇都試過因同名同姓被認錯，據佢了解，有個「陳勇」依家喺福建社團聯會負責青年工作，早前帶團去福建。最近佢撞到友人時傾開偈，仲畀人誤以為帶團嘅就係佢本人添！

翻查資料顯示，同陳勇同名同姓或一字之差嘅多不勝數，例如一個內地高級軍官就同佢同名同姓，至於陳勇前、陳勇成等名字更只係一字之差，其中後者更係食品集團董事長，每隔一段時間都會接受傳媒訪問，但講到尾，仍然係佢呢個陳勇較為人熟悉嘅。

講開同名同姓，政圈也有多對「雙生兒」，好似胡志偉，一個係白鴿黨「雙料議員」，一個係香港教會更新運動總幹事，認真係世界真細小嘞！

咁多人叫陳勇點搞呢？其實，要識別到陳勇本人都唔係冇辦法嘅，事關佢英文名叫Brave，都係解作勇敢，咁中文名再加埋英文名Brave，咪可以認到佢嘅真身囉！

第一手消息請下載on.cc東網iPhone/iPad/Android/Windows Phone Apps