亂堆填有法不執 食環署廢過垃圾

件事係咁嘅，油麻地寧波街至南京街交界一段新填地街，已經淪為無王管嘅「公共垃圾站」，每朝堆積咗超過二百包垃圾，廚餘、廢料乜都有，污水橫流，臭氣熏天。最慘係馬路兩邊嘅生果、衣物、鞋履排檔，環境咁惡劣，邊有人幫襯吖。

點解搞成咁？原來每晚七點幾開始，陸續有人用手推車將附近食肆同商舖嘅大包垃圾，推嚟呢度棄置。凌晨時分食肆打烊後仲誇張，運垃圾兵團穿梭往來，一包包垃圾幾乎填滿成條街。附近部分居民亦唔執輸，見通街垃圾，一於揼埋一份。

早上做排檔，晚上垃圾崗，附近檔主每日要等垃圾車搬走垃圾，洗埋街，十一點幾之後至可以開檔，但臭味久久不散，點招徠顧客吖，招惹烏蠅就差唔多。

內地小童隨街便溺，當局就話執正來做，咁有人隨地揼垃圾，點解又無王管？唉，講起食環署執法，真係火都嚟埋。佢哋見到附近食肆同商舖亂揼垃圾側側膊唔多覺，變相鼓勵垃圾蟲，助紂為虐，結果咪搞到連食環署外判清潔公司職員都揼埋一份囉！有立法會議員就鬧得啱嘞，食環署唔加強執法，完全係失職，等同縱容食肆將清倒垃圾嘅責任轉嫁畀政府，變相用公帑為違法者埋單。

話時話，港產官僚冇做好本職，連捉垃圾蟲咁基本嘅工作都做到甩甩漏漏，又點可以要求市民做好本分，配合港府改善垃圾處理同源頭減廢嘅政策吖。嗱，過兩日港府擴建將軍澳堆填區及石鼓洲焚化爐撥款申請，會闖立法會工務小組，地區民眾同區議員企硬反對。無他嘅，港府執法不力，變相做埋垃圾蟲，叫市民點支持吖？呢次「一堆一爐」過唔過到骨都危危乎，「三堆一爐」更加唔使諗。

仲有吖，當局打算推行垃圾徵費，本來呢，有利環保嘅事，市民都會支持，亦唔介意付出代價。問題係，家陣港府廢過垃圾，乜都唔做，淨係識收錢。新填地街堆滿垃圾都冇人理，食肆商戶居民你揼佢又揼，棄置垃圾政府埋單，自己一個崩都唔使畀，如果個個有樣學樣，垃圾徵費摺埋都得咯。

咪話太一叮唔提醒，如果港產官僚繼續懶懶閒唔執法，香港遲早變垃圾港嘅咋，叮！