城中鏡：中大加宿費 沈祖堯解畫
中文大學新學年加書院宿費引起部分學生不滿，中大校長沈祖堯透過網誌解畫，指近年水電費用大幅上升，樓宇維修費昂貴，所以有必要增加宿費，佢強調大學同書院並非牟利機構，所獲資金每分每毫只能用喺教學同研究上，增加宿費係為咗維持宿舍嘅日常開支、樓宇保養同維修，唔係納入教職員嘅額外收入或花紅喎！
沈祖堯話近年水電費大幅上升，中大有必要加宿費。（資料圖片）
中大提出下年度宿費加百分之七，引起學生聯署反對同靜坐抗議，最終中大決定將新學年宿費加幅調低至百分之四點五。對於有學生認為中大有「大量」盈餘，應用嚟資助宿費，幫助有需要嘅學生。
沈祖堯話大學盈餘係多年嚟累積嘅捐獻，大部分有指定用途，或用嚟做固定基金，以賺取利息支付每年逾一億元嘅學生獎學金同出外交流計劃、購買儀器、聘請優秀教研人才等。中大已增撥資源設立宿費補助基金，津貼有經濟需要、但得唔到政府資助嘅學生。
曾任逸夫書院院長嘅沈祖堯又提到，感受到各書院院長同所有教職員以關懷同愛護同學為本，相信同學亦同樣愛護書院，如果宿生能減省水電等公共開支，宿舍整體開支會降低，宿費亦有下調嘅空間咁話。
