相信年紀有番咁上下嘅香港人,仲記得以前有位名廚叫陳東,經常上電視向觀眾講解不同食材烹調方法嘅食療效用。陳東師傅已喺十多年前過身,但原來佢囡囡Beatrice陳嘉惠承繼咗爸爸嘅遺志,成立咗個組織推動健康天然飲食。最近Beatrice仲同著名英國靚仔名廚Jamie Oliver合作,喺香港推動飲食革命。

陳嘉惠深得爸爸陳東真傳,崇尚天然又健康嘅飲食文化。

提倡天然健康飲食嘅Jamie Oliver,近年喺全球發起「為食起革命」,包括訂出下周五(五月十六日)做「為食革命日」,發動不同國家及城市嘅識食人士,喺當日一齊製作同一味菜式「彩虹沙律卷」,佢喺香港嘅合作組織,就係Beatrice創辦嘅go.asia。Beatrice尋日就喺一個商場內,向香港嘅志同道合者公開示範點做呢道菜。

Beatrice話城市人日常享用嘅食物,好多都係經過人為加工,例如成分根本冇橙嘅橙味汽水,冇檸檬嘅檸檬味蛋糕等,呢啲食品嘅色香味全靠化學調校而來,經常食用對身體肯定有不良影響,現代人唔少病痛可能都係因此而來,呼籲港人為咗自己健康着想,喺飲食上必須懂得選擇。

第一手消息請下載on.cc東網iPhone/iPad/Android/Windows Phone Apps