城中鏡：黃進達復辦旅團 除「菲」安全

對於港府調低針對菲律賓嘅旅遊警示，Jason話無論係邊種顏色嘅旅遊警示，只要市民夠膽去，都總可以買到旅遊保險，只係受保範圍會因應發出警示嘅原因而有所不同，有意成行嘅市民事前一定要問清楚。

轉頭見到向來鍾情攀山滑雪嘅利希慎家族後人兼馬會大董Michael利子厚，談及上月嘅珠峰致命大雪崩，佢強調自己安全至上，尤其係登珠峰呢啲咁艱難嘅旅程，一定要再操弗啲、累積更多攀山經驗先會敢去。

利子厚登山揀天氣

利子厚話自己最鍾意揀攝氏五至十幾度天氣時登山，地點就偏愛不丹及西藏，亦試過同太太一齊喺蒙古登山。至於本港行山嘅好去處，佢就推介大嶼山同佢山頂屋企附近一帶，對於政府最近力推發展大嶼山，佢就好希望該處嘅自然環境得到保留同保育。

同樣熱愛外遊同行山嘅另一馬會大董陳南祿亦所見略同，話珠峰係啲專業攀山人士先至應付到，佢就冇諗過去，並提醒大家但凡係雪山都唔易行，千祈唔可以睇少。期間又遇到港鐵前行政總裁周松崗，高鐵工程延誤風波鬧到熱烘烘，梗係要問問佢點睇啦，但佢就斬釘截鐵咁話，自己不在其位、不謀其政，唔會評論任何有關港鐵嘅事喇。