政壇：搞搞政：逾60公司申入廠商會 林建岳被指有種票之嫌
香港四大商會之一嘅香港中華廠商聯合會爆發爭位戰，兩名副會長李秀恒同顏吳餘英都有意喺年底嘅換屆選舉中爭做會長一職，會內出現唔少明爭暗鬥，最後要由本來唔想選嘅第一副會長陳淑玲重出江湖，以求平息內亂。有人近日再向我哋報料，指上個月突然有六十幾間公司「趕尾班車」申請加入廠商會做會員，啱啱趕得切合資格喺年底嘅會董選舉中投票，令人質疑有種票之嫌。最特別嘅係，呢六十幾間公司，超過九成都同麗新集團主席林建岳有密切關係，可能唔止同今次會長之爭有關，甚至涉及一六年嘅立法會功能界別選舉。
設計圖片及對白
根據廠商會會章，新加入會員最快喺半年後擁有投票權，而過往廠商會會董選舉一般係喺十月份舉行，換言之喺四月份入會，就啱啱趕得切合資格喺今年尾嘅改選中投票。喺四月份申請入會嘅公司有六十六間，當中六十一間公司嘅董事代表其實來來去去都係五個人，而呢五個人咁啱得咁蹺，都同林建岳或佢旗下嘅公司有關。
長子一人代表15公司
例如林建岳旗下嘅寰亞集團執行董事呂兆泉，便一人分演二十七個角色，分別以華星唱片、東亞唱片、東亞娛樂、大岳娛樂、洲立影視等二十七間影視公司嘅董事身份申請加入廠商會。林建岳長子、年紀輕輕嘅林孝賢亦唔輸蝕，一人代表十五間建造業公司申請入會。
其餘三名關連人士有另一寰亞集團執董陳志光、麗新發展行政總裁劉樹仁同麗新發展副主席周福安，前者一口氣代表十一間公司申請做廠商會會員，包括寰亞影視、寰亞藝人管理、寰亞傳媒中國、寰亞音樂出版等，劉樹仁同周福安就分別代表六間同兩間公司申請入會。
我哋問過廠商會會長施榮懷，佢強調廠商會每個月都有唔少會員加入，同一個月內有六十幾間公司入會一啲都唔出奇，而且每間公司申請入會都需要經過內部審批，只要核實符合資格就冇得唔批。佢又指出，過去廠商會會員以傳統工業廠家為主，但近年亦多咗好多非傳統工業會員加入，今次一次過有咁多創意工業公司加盟，對個會嚟講其實係好事。
有廠商會中人透露，林建岳今次大舉進軍廠商會，相信唔止係想幫人拉票做會長咁簡單，有指係涉及一六年立法會選舉，派出由佢擔任監事會主席嘅經民聯成員出選工業（二）功能界別，接替預計會轉戰地區直選嘅現任立法會代表林大輝，甚至有說係涉及一七年特首選舉嘅爭位戰添。我哋嘗試過聯絡林建岳方面嘅回應，但對方就話冇嘢講喎。
