政壇：騎呢政改方案攪珠抽提委
政改首階段諮詢剛結束，全民在野黨未趕上尾班車，直到尋日先公布破格出位嘅政改方案，建議提名委員會由四大界別變身為四十界別，由合共二千人組成，市民可自行選擇一個界別登記，其後由四十名童男童女以公開攪珠形式，每個界別抽出五十人成為提委。
全民在野黨建議市民可自行選擇界別登記做提委，並由四十名童男童女以公開攪珠方式抽出。
為鼓勵市民做提委，該黨又建議每名委員可以獲一萬元津貼，換言之由二千人組成嘅提委會，合共就要二千萬元津貼。至於參選人只需獲得三百名提委提名，就可出閘成為特首候選人，再交由市民一人一票選出。
當問及建議方案有幾大信心可以落實，全民在野黨創會會長李概俠話香港市民有智慧，其後又展示自己分別同世界維吾爾代表大會主席熱比婭，以及西藏流亡精神領袖達賴喇嘛嘅合照，報稱上月中曾到美國同熱比婭會面並推介政改方案，引述對方形容方案係「陽光、平等」，其後更指呢啲人唔係藏獨或疆獨，而係有人心中有毒喎。究竟李概俠公布政改方案前，要先問熱比婭意見嘅用意何在，呢個只有佢至知喇！
