政壇：踩過界講政改 鬍鬚曾得閒得滯
仲記得社民連「長毛」梁國雄早前向財爺鬍鬚曾掟陰司紙，鬍鬚曾即場以「行開啦」回敬對方，事後解釋仲差啲講到自己疑似想爆粗咁。事隔只有半個月左右，鬍鬚曾一心坐定定應對立法會拉布戰之苦，殊不知上周三突因法定人數不足流會，唔知係咪因為得閒得滯，尋日再下一城踩過界講埋政改，狠批部分民意代表表現，令人懷疑佢哋極端立場，唔係討價還價，而係寸步不讓，甚至有拉倒政改準備喎。長毛繼續死咬鬍鬚曾不放，反駁指鬍鬚曾發表有人「寸步不讓」論調，應該「面紅」喎！
設計圖片及對白
鬍鬚曾尋日喺自己網誌地盤，以「一起實現普選」為題踩過界大談政改。佢認為香港政制發展必然受到環球注視，倘香港能實現普選，肯定有助提升香港國際形象以至整體競爭力，相反繼續喺政制問題原地踏步，將來可能出現社會不穩定，甚至對香港政治前途有各種猜測，勢將拖累其他方面發展。
指極端少數拉後腿
其後佢更以立法會拉布戰為佐證，直指依家情況反映香港政治現實，少數極端聲音緊緊拉住其他議員後腿，令呢啲議員既不支持拉布，也不支持剪布嘅模棱兩可立場，同樣地政改討論也出現不着邊際爭議，如會面地點、係咪公開進行等問題，令佢擔心整場討論就係圍繞無關宏旨問題上兜圈。
有份拉布嘅長毛反駁，指拉布係爭取設立全民退休保障，然而政府一直不肯，認為鬍鬚曾反指有人寸步不讓應該「面紅」，否認自己拖其他議員後腿，只係做其他議員不敢做嘅事。
不過，話說回來，鬍鬚曾喺政改嘅敢於表態，即使要踩過界都在所不惜，更顯得負責領軍做政改諮詢嘅司長未有做好呢份工，佢關鍵時候對於泛民嘅步步進逼，都只係和稀泥虛應了事，認真係輸人又輸陣喇！
