潮語「應機」嘅意思，就係喺社交網站如「飛士卜」或手機即時通訊程式，對訊息作出回應，又或者喺討論區被追問而作出回應。「應機」嘅相反潮語就係「潛水」，「潛水」就係完全唔「應機」，玩失蹤。「應機」嘅「機」可以係手機，亦可以係電腦。

科技不嬲係以玩人為本，高科技嘅嘢，我自問真係唔識。自從上世紀電話call機面世以嚟，到今時今日一街都係智能手機，三歲到八十歲都喺度對住部手機篤篤篤……就連我一歲嘅細仔，都扭計要玩手機，到底大家有無統計過，你嘅眼睛每日花幾多時間對住部手機？大家又明唔明白，人生除咗tvb.com、candy crash同facebook外，仲有好多嘢值得我哋花時間去欣賞？大家又記唔記得上一次拎起支筆，寫信畀朋友又係幾時？又或者，好好同知心朋友見面敍舊，把酒談心真傾偈又係哪年哪夕？自從有咗「wat app」之後，親朋好友之間，連真正嘅聲音都聽少咗，以前電話聯絡，起碼都有把人聲，依家就只剩下一大堆短訊。以前，放工離開咗公司部電話，就真正收工去也。依家，老細或者客戶有你手機號碼，就等如On call 36小時，隨時「wat app」你，真係搞到你神經衰弱。唔知大家又有無發現，今時今日有好多人，你打電話畀佢係經常唔會接聽，但你「wat app」佢，佢係會「應機」個噃！呢啲又屬於咩心態呢？

但係其實「應機」嘅「機」，最早係指以前的士裏面，軚盤隔籬，司機叔叔終日揸住嗰部對講機！「應機」呢句潮語，其實本身係的士call台嘅專屬用語，意思係「回應對講機」。因為，以前坐的士，乘客係會聽到的士對講機對話嘅。但自從司機駕駛嘅時候不准拿着通話裝置對話嘅法例實施咗，現在聽少咗好多。作為的士乘客，會成日聽到「應機」呢個字，後來網民借用咗，成為「潮語」。

「應機」唔係必然嘅。人係有權唔「應機」，簡單講即係唔睬你。所以逢親放假，陪家人或者戀人拍拖二人世界期間，最好都係熄咗部機，大條道理玩「潛水」，天王老祖搵你都唔「應機」，闊佬懶理。

第一手消息請下載on.cc東網iPhone/iPad/Android/Windows Phone Apps