香城四魔為患已久，搞到香城民不聊生，雖然四魔之間一直相安無事，但四魔之中的港鐵魔，卻按捺不住，要借「起膠鐵」一事，挑戰其餘三魔，力圖登上魔中之魔的寶座。如是者，港鐵魔約了三魔，三更時分於立法會屋頂商討。

「哈哈！地產魔，電魔，油魔，好耐無見喇！」港鐵魔剛收拾了幾個使出「凸拳法」的侍衞，正好遇上三魔赴約。電魔油魔面露鄙色，輕吐一句：「哦，咁咋。」

「哼，識搞掂班『已完』又點？根本係垃圾！」地產魔見狀，出言相諷：「好似我咁，大家聽聽話話咁供養我，唔使郁手郁腳，連港姐都寧願賣魚蛋養我，證明我惡過tbb！」

「哦，咁咋。」電魔油魔依舊如此回應地產魔，恐怕二人武學修為已臻，無視外圍環境，一招已可獨步天下，真也難怪無論燃料價升跌，二魔利潤只升不跌。

「單憑幾下拳腳當然唔夠你哋勁啦，不過我港鐵魔梗係有備而來……」港鐵魔對三魔來個絕地大反擊：「家陣我係話鬥『摩』呀！你哋邊度夠我有資格做『摩中之魔』？」

第一手消息請下載on.cc東網iPhone/iPad/Android/Windows Phone Apps