政壇：搞搞政：「飲咖啡」兩年陳智思叫苦
行政會議成員陳智思係「公職王」，個底計正白過白開水，點知佢尋日出席廉政公署舉辦嘅青年高峰會時，竟自爆十四年前都被執法機關查過，仲查足兩年添，搞到佢非常痛苦咁話。雖然佢冇講係畀邊個機構查，但喺廉署嘅活動大講「飲咖啡」（助查）嘅往事，佢都勇氣可嘉。
設計圖片及對白
話說二○○○年，陳智思名下公司一位高級行政人員犯咗刑事罪行，結果連累身為老闆嘅陳智思被查，嗰兩年佢形容自己真係日子難捱，成日瞓唔安、食唔落，發夢都驚第朝做咗各大報頭版，最後佢當然係冇事啦。今次事件畀佢好深體會，千祈唔好乜嘢都視為理所當然，你行得正、企得正，唔代表你身邊嘅人都係，佢哋隨時因為抵受唔住誘惑而犯法，仲連累到人添！
高峰會現場仲有唔少熟悉嘅面孔，前「一哥」李明逵就勸勉青少年，錢唔係最重要，錢買唔到開心同健康，做人最緊要係誠信。有青少年就好關注貪湯前廉政專員湯顯明事件對廉署嘅影響。
