政壇：港版米芝蓮嚴選神秘食客
為抗衡法國《米芝蓮指南》以西方味蕾操控本土美食命脈，香港五大飲食業商會聯手舉辦《香港味之年賞》，公開招募港產識食之人任神秘食客，由港產舌頭重掌美食話語權，尋日仲大擺「龍門宴」，邀請各路人士接受十人顧問團味之考驗，以便選出識食之人做神秘食客。尋日神秘食客候選人會見傳媒，為防尊容曝光而戴上眼罩，搞手之一嘅飲食界立法會議員張宇人（Tommy）早有預備搞氣氛，戴上疑似飛虎隊的攀山頭巾連口罩，仲加上一副黑超，造型勁搞笑，被笑似拉登，有人仲建議佢改名做拉丁添！
神秘食客候選人為免尊容曝光，齊戴眼罩合照。
呢場「龍門宴」喺稻香訓練酒樓場地舉行，顧問團成員稻苗學會主席黃傑龍（Simon）亦有出席。Simon話，神秘食客應該用專業及精準字眼點評每道菜，好似食牛扒咁，識食之人至少會形容吓塊扒來自隻牛嘅邊個部位、紋理同煮法。
尋日共有一百四十名神秘食客候選人，即場試食九道唔同菜式，仲要就每道菜回答唔同問題，以便顧問團其後挑選出最識食嘅三十至五十人，下月起暗訪二百間「心水優質食府」神秘試食。
