政壇：建仔「四不像」瓣瓣唔掂
早前活動籌得近七千萬元嘅民建聯（建仔）雖然財源廣進，但喺政壇上卻到處受靶，幾個議題都畀人鬧爆，包括高鐵、「三堆一爐」及政改等，主席譚耀宗點樣應付呢場跨界別大狙擊備受關注，不過建仔一邊要盡保皇責任，一邊又想騎呢扮貼近民意，分分鐘搞到自己四不像，譚Sir睇怕都係企定定、畀人炳實際啲！
設計圖片及對白
政改方案被批高門檻
先係高鐵工程，自從港府公布咗高鐵工程延誤最少一年，外界預料造價可能會大增十億至百億元，先係一批大專生走到位於北角嘅建仔總部抗議，聲討佢哋當年強行支持高鐵上馬，所以先有呢個「大白象」工程出現，白白浪費市民嘅血汗錢喎。咁早算定帳，以後高鐵有乜問題都綑綁住建仔喇。
其次係政改，建仔上星期提出佢哋嘅方案，建議參選人要得到提名委員會過半數委員支持，先可出閘成為候選人。佢哋嘅立場大家都預咗，但泛民都趁機發功，批評建仔「高門檻」難以接受，連政府官員都話方案較難凝聚共識喎。政改諮詢第一階段要一個多星期先至結束，政府之後整合意見，再推出第二階段諮詢，但建仔呢個半數方案都有排畀人鬧，仲會成為泛民陣營攻克嘅堡壘。
最後係三堆一爐，自從環境局去年提擴建本港三個堆填區嘅方案被立法會否決後，政府近日再向立法會提「三堆一爐」方案。當大家以為建仔會全力支持政府時，佢哋嘅屯門區議員竟然喺環境局局長黃錦星（星星）出席區議會會議時拉隊走人，有泛民質疑，其實建仔咁離席抗議，實情只係要避免表態啫。政府嘅建議仲未獲工務小組委員會通過，之後仲要經過財務委員會同立法會大會呢兩關，建仔最後投票取態係點，點會咁早定呀？
