周一嶽信口開河 爛電池添煩添亂

係咁嘅，周一嶽早排話要檢討《種族歧視條例》，保障內地人免受歧視，仲實牙實齒話已有時間表，今年第三季會就修例諮詢公眾，明年向政府提交報告喎。點知此話一出，中港矛盾唔單止冇緩和，反而引發新一輪爭拗，弄巧反拙。可能見勢色唔對啩，佢又改口稱中港歧視問題有所改善，如果情況冇持續惡化就唔使修例。

喂，制訂政策前要經過嚴謹論證，呢個係基本常識，點可以好似山草藥咁，噏得就噏，一時一樣o架。難怪有立法會議員狠批周一嶽言論輕率，嚴重影響平機會公信力，有議員甚至直斥佢精神錯亂添。

係囉，廣告都有話，做嘢前要「停一停，諗一諗」啦，周一鑊信口開河，唔撞板至奇吖。其實學者一早警告，中港矛盾有增無減，以為訂立反歧視法例就可以化解，未免太傻太天真，倉促提出修例反而會激化矛盾，添煩添亂。學者苦口婆心，可惜周一鑊完全當耳邊風，結果咪唔衰攞嚟衰囉。

老實講，中港矛盾錯綜複雜，高度敏感，周一鑊插隻腳埋嚟，已經係不自量力，偏偏佢仲要另闢同性婚姻問題嘅「戰場」，公開促請政府先做好性別認同程序，先至檢討婚姻條例咁話。你知啦，同性婚姻議題敏感程度比中港矛盾猶有過之，連比較開放嘅西方社會都未有定論，周一鑊隨口噏當秘笈，只會引起社會撕裂o架咋。

如果話有人死後捐贈器官係「遺愛人間」，咁廢官落台後遺下爛攤子肯定係「遺害人間」。周一鑊做食衞局局長八年禍港八年，搞到公營醫療系統一塌糊塗，大小事故無日無之，市民至今仍身受其害，絕對係典型嘅遺害人間。好嘞，好多市民以為周一鑊落台就雨過天青啦，點知政府竟然搵佢接掌平機會，簡直無厘頭。好多人諗極都唔明，香港又唔係冇人才，點解政府對爛電池情有獨鍾呢？唔通真係嫌未夠衰？呢嗱，佢做咗平機會主席一年，已經搞出咁多笑話，你話當局係咪捉蟲吖？

俗語有云，人不能兩次掉落同一個坑。計太一叮話齋，人亦不能兩次捉同一條蟲。周一鑊渾渾噩噩，成條害人蟲咁，畀佢害一次都嫌多喇，當局點解要一錯再錯呢？叮！