舊年港交所首次舉辦LME亞洲年會，今年挾着「滬港通」氣勢，大有條件大搞喇。重頭戲LME晚宴尋晚舉行，場面墟冚到不得了，由上年嘅八十幾圍，勁加到百幾圍，由於圍數太多，要移師至會展新翼慶回歸個大廳，可想而知，有幾大陣仗。

李小加（右一）同赴晚宴嘅男士齊打黑色煲呔，場面震撼。

LME晚宴嘅dress code 係黑呔，男嘅要燕尾服加黑色煲呔，女士就穿晚禮服，試想像百多圍、過千人，男男女女着得咁隆重，就好似電影場面咁震撼。現場當眼位置仲擺咗李小加大大張poster，好有占士邦電影feel。

港交所總裁李小加舊年又扮碧咸、又舞龍，今年聽聞佢就玩即興，不少工作人員都唔知佢開邊瓣。不過，相信佢表現都係同動態有關，多數係跳舞之類。咁又係，小加總裁份人咁活躍，又鍾意踢波，唔通叫佢表演書法咩？

第一手消息請下載on.cc東網iPhone/iPad/Android/Windows Phone Apps