城中鏡：鄭國江准秘撈顯才華
香港教育學院眨眼間已成立二十年，即使未正名為大學都要賀一賀，除出版特刊《教院人．師範生》外，尋日仲特別邀請民政事務局前局長「藍爺」藍鴻震、著名填詞人鄭國江、時裝集團嘅主席George黃銳林、擔任視藝科老師的十大傑出青年張寶雯等名人校友趣談教院往事。
藍鴻震（左）同鄭國江（右）惺惺相惜，互相欣賞。
張寶雯（左）同教院校長張仁良（右）都冀教院正名進程轉入大直路。
黃銳林自言非常享受教學樂趣，退休後一定重執教鞭。
六十年代畢業於葛量洪師範學院嘅鄭國江，感恩當年受美術教育薰陶，先創作出《在水中央》等如此雋永嘅歌詞，又透露多得任教多年嘅津貼學校容許佢兼職填詞，先創作出包括《IQ博士》等經典兒歌同金曲。
同場嘅藍爺竟笑言，好彩鄭當年沒有選擇教官校，否則香港就冇咗個填詞人才喇！
藍爺撐教院正名
此話何解？藍爺話因為任職官校身份等同公務員，掣肘多多，肯定唔可以兼職填詞。言下之意，即係鄭當年入官校反而會埋沒才華？藍爺作為羅富國師範學院畢業生，當然力撐教院正名為大學係必然嘅事，自言早已當教院係大學，時刻都對教院出身感到光榮添！
講開又講，多得鄭國江當年執起支筆填詞，如果唔係「財爺」曾俊華點會引用到由佢填詞嘅《交叉點》歌詞：「不信命運，但信機會」，為年初嘅財政預算案作結呢？鄭國江仲向教院送上一曲《一點燭光》，寓意為人師表即使好似燭光咁微不足道，亦發揮緊影響力照亮好多學生嘅人生，相當有意思。
原來喺柏立基師範學院畢業嘅George創業前教過十年書，佢坦言因為當年體育老師一句：「最緊要老實，唔好怕核突」，時刻警醒佢做生意都要坦誠，可想而知老師說話對學生嘅重要性。
