香港大學民意研究計劃尋日公布立法會議員最新民調結果顯示，白鴿黨「AV仁」何俊仁、工黨「阿人」李卓人、公文袋「袋巾傑」梁家傑同建仔「譚Sir」譚耀宗嘅評分大插水，紛紛跌至議員生涯新低，其中AV仁更勁跌九點一分，跌至三十九分歷史新低點，原因相信佢個花名已經解釋清楚喇。

設計圖片及對白

港大上月底至本月中以電話訪問約千名市民，結果曾鈺成、葉劉淑儀繼續蟬聯第一同第二，但數評分谷底就非AV仁莫屬。AV仁自二月底喺立會聽財爺宣讀財政預算案演辭期間，偷睇水着索女艷照被斷正後，多年來辛苦建立嘅專業形象連帶民望齊齊插水，排名僅次於「長毛」梁國雄，認真羞家。

大肚腩阿人搞絕食團

至於阿人，自上月打鑼打鼓吹雞發起泛民主派普選絕食團，動員十七個自己友無限期絕食，但佢就捧住個大肚腩喺隔籬吶喊助威。可惜，絕食團由開始到結束都得唔到大眾關注，莫講話向政府示警，令市民、支持者大失所望，感覺唔知為乜，阿人今次跌二點三分、排名第六係可以理解。

至於袋巾傑就肯定衰「扭擰」，早前全體議員到訪上海傾政改，佢因為長毛攜帶「六四」物品入境被拒返港而發難，臨時決定唔飛上海，扭扭擰擰難怪跌至○六年上榜以來新低點。建制派嘅譚Sir無端端跌二點六分至九四年新低，插水嘅原因無從解構，唔通今鋪「趟着也中槍」？

第一手消息請下載on.cc東網iPhone/iPad/Android/Windows Phone Apps