政壇：通訊局收文言文投訴信
大家有冇諗過寫投訴信用文言文？話說通訊事務管理局主席何沛謙尋日同傳媒茶敍時，講到近幾年收到有關廣播內容嘅投訴數字，單計去年收到嘅投訴，就有成三萬九千宗，足足比兩年前升咗十倍咁多。
除咗投訴上升外，投訴信千奇百怪乜都有，最奇特係有人用文言文投訴，真係語言能力差少少，都理解唔到投訴內容。佢話曾經有投訴人寫咗幾十頁投訴一個節目，但投訴信一個標點符號都冇，搞到職員睇到眼都凸，其實每個投訴當局都要認真處理，呼籲大家唔好濫用投訴機制喎。何沛謙明年三月就卸任通訊局主席，雖然未知會唔會再續任，但就感觸話任內處理幾項具爭議性嘅續牌同新牌照事件，全部都係按足程序處理，冇受過任何政治壓力。
