股神巴菲特又再表現真金不怕洪爐火嘅技能！佢嘅旗艦公司巴郡，下個月開股東周年大會，同往年一樣，佢打算搵位唱衰自己公司嘅基金經理參加，但好大口氣咁話搵個「熊仔」好難，即係曲線唱好自己，個個基金都睇好巴郡囉。

股神有咁嘅諗法都唔係第一次喇，上年嘅周年大會，佢就請咗知名對沖基金經理Doug Kass。人哋都已經講到明睇淡公司嘅前景，巴菲特都仲請佢去，咁鬼藝高人膽大嘅行為，唔係個個得o架！

唔單只咁，佢好多時接受訪問時都好有料到，好似早前佢接受CNBC訪問時就講到，喺可口可樂派股份畀持股人做補償嘅方案投咗棄權票，當大家都揣測佢想賣咗可口可樂啲股份嘅時候。作為最大股東嘅巴菲特又即刻大派定心丸，話自己好愛可口可樂，好尊敬班管理層，從來都無諗過賣股份，仲話鍾意可口可樂到無可能會投反對票。

一陣又投棄權票，一陣又賣口乖，真係睇唔透股神諗緊乜！

第一手消息請下載on.cc東網iPhone/iPad/Android/Windows Phone Apps