政壇：硬銷提委會 唐唐扮特首
政制及內地事務局推出新一輯名為《來自普選的理》嘅宣傳短片，仲搵嚟前政務司司長「唐唐」唐英年解釋提名委員會（提委會）嘅重要性。喺長達一分三十秒嘅短片入面，打藍色領呔嘅唐唐以流暢嘅聲調重申，《基本法》第四十五條唔單止列明香港要達致普選嘅目標，仲列明特首候選人會由一個有廣泛代表性嘅提委會，按民主程序提名產生，全程一啲甩漏都無。莫非唐唐喺片中當正自己做咗特首，所以先會講得咁流暢？
唐英年幫政府拍宣傳片推銷提名委員會，重申公民提名有違《基本法》。（互聯網圖片）
唐唐亦喺片中強烈暗示公民提名等另類提名方式有違《基本法》規定，皆因《基本法》列明普選制度要由提委會負責提名候選人，如果有方案企圖繞過或削弱提委會權力，都好難符合《基本法》嘅條文同立法精神。不過，就算政府搵乜嘢人出嚟宣傳，點樣花盡唇舌，相信泛民主派依然當係耳邊風，繼續向市民推銷公民提名，更嚴重就係發展至佔領中環。
