政壇：曾鈺成靠害鬍鬚曾！？
財爺鬍鬚曾經常批評立法會議員拖延立法會審議財政預算案撥款進度，但其實佢一直以來都可能射錯邊。好似尋日咁，主席曾鈺成又再批准多二百三十二項議員修訂，令即將審議嘅《2014年撥款條例草案》累積近一千二百項修訂，議員就話可以行出行入休息吓，但鬍鬚曾就冇呢個特權，要全程坐定定喺度，所以今次鬍鬚曾被玩死，應該怪曾鈺成至啱。不過，「拉布」戰因為修訂增加而拉長咗，到頭來又係要靠曾鈺成「剪布」，咁佢豈不是玩人變咗玩埋自己？
設計圖片及對白
今年勢破百小時
根據近兩三年慣例，每年立法會審議《撥款條例草案》時，都少不免出現拉布場面。上年拉布戰有近七百項修訂，都已經花近七十個鐘審議，依家總修訂數目高達一千二百項，睇怕今年拉布戰要「破百小時」都唔係難事，鬍鬚曾係時候諗吓點樣渡過呢個漫長歲月。
曾鈺成尋日批准嘅修訂，其實由社民連「長毛」梁國雄提出，主席早前先啱啱刪走長毛近千項修訂，但隨即又容許佢再補交新修訂，尋日批准晒長毛所有新修訂，唔通曾鈺成故意放水畀長毛？呢個推測非常合理，話晒拉布主因係長毛不滿政府唔制訂全民退休保障，由於呢個「大頭佛」係政府搞出嚟，曾鈺成又唔係政府中人，當然唔會主動攬上身啦！
但要睇曾鈺成係咪想靠害鬍鬚曾，就要睇佢幾時「剪布」喇。今次修訂比上年仲多出一半，如果上年都用咗七十個鐘，今年一定更多，如果曾鈺成唔剪，立法會分分鐘去到暑假都未必審完。但曾鈺成次次都懶神秘，去到最後關頭先交代幾時剪布，睇嚟鬍鬚曾除咗諗定方法抵抗睡魔來襲外，仲要金睛火眼睇實曾鈺成幾時剪布至得。
