中港矛盾又起火 小題大做徒添亂

係咁嘅，網上近日流傳一段短片，一對內地夫婦同香港市民喺旺角街頭發生衝突，又拉又扯，互相指罵，場面火爆，究竟發生乜嘢事呢？原來，內地夫婦嘅兩歲幼童情急之下就地便溺，有途人舉起相機將呢幕兒童不宜嘅場面拍低，結果觸發一場中港同胞街頭罵戰。本來呢，兩地居民因為文化衝突演變成肢體衝突，大家早已見怪不怪，問題係網絡世界無遠弗屆，短片傳返內地後引起巨大波瀾，中港罵戰一下子由旺角街頭蔓延至全國，甚至成為國際新聞添。

唔少香港網民批評內地客不文明，教幼童隨處便溺有失斯文。不過，更多內地網民批評香港人不近人情，行為偏激，刻意針對內地遊客，甚至連內地官媒都發表評論文章，呼籲香港社會包容友善。更不可思議嘅係，有內地網民呼籲六月一日後罷遊香港添，今次真係唔知點收科。

即係咁，相嗌唔好口，今次兩邊嘅做法都值得商榷。入鄉隨俗吖嘛，內地遊客來到香港，就應該遵守香港嘅法規，尊重香港人嘅文化，唔好講隨處便溺嘅不雅動作吖，以前有內地遊客喺港鐵車廂違規進食或者爭位坐，已經發生多宗衝突事件。旅行係尋開心，唔係尋激心，何必搞到乘興而來，敗興而返呢！

至於部分香港人太過偏激，刻意針對內地客，亦有失包容。話晒過門都係客，內地遊客如果行為不當，咪好言相勸囉，一味惡言相向，唔止有失風度，仲隨時火上加油嘅咋。好似今次事件咁，幼童當街小便係唔啱，但父母都用尿布接住，盡量保持地方清潔喇，何必小事化大呢？

所以話，天下本無事，庸人自擾之。好多時候就係因為大家心存偏見，互不包容，先至將小事化大啫。冇錯，內地旅客愈來愈多，確實帶來唔少問題，影響港人正常生活，之不過咁，旅遊業係本港經濟支柱之一，好多市民靠佢食飯，香港究竟係需要清淨，抑或需要發展經濟，大家真係要好好諗一諗。今時今日，其他國家都大力發展旅遊，爭相吸引內地旅客，唯獨香港有人嫌旅客太多，一時驅蝗，一時拖篋，搞到七國咁亂。

當然喇，人必自侮而後人侮之，內地客被視為「蝗蟲」，自己亦要好好反思。面係人哋畀，架係自己丟，出外旅遊最緊要注意文明，咁先至會得到人哋尊重吖嘛，係咪！