旺角西洋菜街行人專用區，自今年初減少周一至周五的開放時間後，路上商舖和樓上住客確實清靜得多，但星期六、日及公眾假期卻仲衰過舊時，因那些自稱「音樂表演者」的搵食工友，為爭客而將其音響喇叭開到二十樓都聽到。

早前呢班搵食工友為博大家支持，有人使盡瞞騙手段去呃人，首先，會話自己唔係賣藝搵錢的，只想喺度「表演」啫！第二、又話自己音響唔係好嘈，並自律Check住分貝不超過政府所限；喺博可憐嗰段期間，咪細聲啲囉！過後，今天，仲嘈過未封路之前呀！聲震全條街，簡直目無王法！但政府各部門，無人做嘢！第三、又話呢度好太平，無人「收陀地」，其實，正正因為有人開檔搵銀，遂引來社團的「關顧」。真烏煙瘴氣！

西洋菜街平靜咗唔夠三個月，就有喺呢度搵食嘅工友向法庭提覆核，爭取「重開七日」。有關法律問題，留待法庭定奪，我只想點出這件事的荒謬處：好多表演者話佢啲音響架生和喇叭，每月要用幾千元在旺角租個地方擺放，若要轉去別區「表演」（其實係開檔搵食），係好麻煩；又現因取消星期一至五的開檔時間，令佢哋蒙受財政損失云云……

喂！香港有邊條法例准許非法無牌在街頭擺賣（或行乞）？如果你只想表演，又使唔使有咁多大型喇叭器材鬥大聲？與此同時，已自爆講出，呢件所謂「街頭音樂人」其實係想搵錢而已！仲有呀！有人借表演為名，自捧成偶像，組「歌迷會」，後被揭發是「斂財」和「行騙」，遭歌迷踩場追數，喺條人多路窄嘅街上爭執，失禮唔要面係騙子的事，但危害社會安寧和秩序，則是不能容許的！

香港地亂，人再卑劣，就無得救的了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps