城中鏡：張敏華做MISS冧爆學生
花旗銀行學堂圓滿結束。呢個結合銀行實務、由花旗香港派多位資深銀行家教書嘅香港大學課程，已經舉辦到第十屆，趁機捉住三個學生，搞咗個我「最喜愛老師」選舉，冠軍係由「新聞之花」轉為「銀行之花」嘅Catherine張敏華！
花旗香港區行長盧韋柏（中）鼓勵學生好好把握眼前機會。
張敏華講嘢好有啟發性，被學生大讚。
喺外國浸過鹹水嘅袁同學話Catherine講嘢好有啟發性，第時想入去花旗做財富管理部門，幫客人度身訂造財務計劃——講咁多即係想跟Catherine搵食啦。嬌滴滴嘅Jennifer同學都係最鍾意Catherine，但個人喜好係法規部門，因為鍾意查吓啲異常交易喎！姚同學就Like爆零售銀行業務主管林鈺華，覺得佢好有個人魅力，由二百年前嘅花旗集團講到今日係金融體系，打通學生嘅任督二脈。
Catherine知道自己咁受歡迎之後話好感動，覺得學生都好積極，二年級已發光發亮。花旗香港區行長盧韋柏就鼓勵學生好好把握眼前機會，機會就會向你拍門。
