城中鏡：青聯會清華友品酒唸詩
無論係乜嘢形式嘅派對，最緊要都係盡興啫！好似香港青年聯會主席霍啟剛前晚就舉行咗個別開生面嘅詩酒文化派對，搵嚟一班北京清華大學尖子，齊齊朗誦古代名詩，淺嘗中國白酒，似足古時嘅文人雅士。
林淑怡（右）打理生意之餘，亦在清華攻讀EMBA課程，霍啟剛話等囝囝大啲，都會去清華讀書。
青聯會員羅彥嵐（左起）、李瑩、電視台主持人盧琛同會董王冠，齊朗誦古代詩人名作。
新鴻基尊尚資本管理高級董事黃仰芳心思思想讀EMBA課程，好學不倦。
以詩酒會友，係古代才子最佳嗜好，但時移勢易，青年人好少有呢番雅興。不過，喺英國牛津大學畢業嘅啟剛話好嚮往中國詩詞歌賦中嘅意境，咁蹺青聯常董兼清華大學經管學院EMBA課程在讀生Mariana林淑怡都係愛好者，前晚約齊一眾EMBA校友及青聯成員，一邊唸詩，一邊嘗中國白酒。
啟剛渴望去清華讀書
青聯派出羅彥嵐、李瑩、盧琛同王冠等人，朗誦李白嘅《將進酒》、白居易《勸酒》同杜甫嘅《飲中八仙歌》，比賽無分勝負，純屬切磋。啟剛聽得津津有味，原來佢小學時曾參加英文朗誦比賽，可惜無緣問鼎獎項。佢至今仍渴望去清華讀書，EMBA當然係優選，希望學以致用，仲話等囝囝大多幾歲，一定會加入清華學生之列。
晚宴搞手之一嘅Mariana近年鑽研白酒學問，不時向內地酒廠董事長偷師。佢話咪以為飲西方紅酒先有文化，中國白酒一樣博大精深，單係種類都分為醬香型、濃香型等。清華經管學院香港校友會副會長James陳進思都拖埋成班校友撐場。James坦言，同學圈中不乏猛人及高官子弟，落堂後最愛把酒話家常，一次過聽晒中國大江南北風土民情，勝過行萬里路喎！
