政壇：搞搞政：立會出天書 貪曾 白鴿黨留污名
立會舊年初邀請喺議事堂經歷咗二十二個寒暑嘅前秘書長吳文華，撰寫一本有關議會程序手冊嘅「天書」，記低多年來議事規則變遷，預定三年後起貨。話咁快就過咗一年多，原來天書首部分，即係介紹立法會歷史、組織同程序嘅篇章已接近完成，下個月會上載立會網站。我哋先睹為快，發現「貪曾」前特首曾蔭權爵士同白鴿黨立法會議員都留下污名，從此遺臭萬年！
設計圖片及對白
天書第一部分，分咗六個章節，當中有章節提及答問大會，其實係港英年代遺留下來嘅產物，到之後嘅特首就蕭規曹隨。天書話有需要時立會可舉行特別答問大會，而呢個「前無古人」之舉，就係由貪曾寫下史冊。
貪曾兩年前被東方報業集團踢爆「貪盡海陸空、歎盡省港澳」後，同年三月一日就應立法會內務委員會要求，出席特別答問大會，「就一連串圍繞他接受朋友款待及在深圳租用一個住宅單位的事件」答覆議員質詢。如大家記得嘅話，當日貪曾扮晒可憐谷淚，可惜啲戲屎過茄喱啡，谷極都谷唔出眼淚，眼睛雪亮嘅市民自然睇得一清二楚。
喺回歸後立會決定沿用以前立法局嘅委員會制度，只係唯一因應《基本法》而新增咗調查委員會，用作調查議員行為不檢，呢個委員會開齋作，就係為咗○九年白鴿黨議員甘乃威涉求愛不遂解僱女助理事件，最後委員會對佢表示「遺憾」。嗱！啲醜事臭史一覽無遺。
